ძალიან არ მინდა დავიჯერო, რომ ციხეში პატიმრის შესაძლო წამების შესახებ გავრცელებული ინფორმაცია სიმართლეა.
თუმცა, ასეთ საკითხებზე პასუხი ვერ იქნება მხოლოდ ფრაზები — „გამორიცხულია“, „ასე არ მოხდებოდა“ ან „ასე არ ხდება“. როდესაც საუბარია ადამიანის უფლებების შესაძლო დარღვევაზე და, მით უმეტეს, პატიმრის მიმართ შესაძლო ძალადობაზე, საზოგადოებას აქვს უფლება, კითხვებზე დასაბუთებული პასუხები მიიღოს.
თუ პატიმრის ოჯახი კონკრეტულ გარემოებებზე საუბრობს და გარკვეულ ფაქტებზე მიუთითებს, ამ საკითხის გარკვევის საჭიროება კიდევ უფრო მეტად არსებობს. ეს არ ნიშნავს, რომ გავრცელებული ინფორმაცია წინასწარ დადასტურებულ ფაქტად უნდა მივიჩნიოთ. მაგრამ არც მისი უპირობოდ უარყოფაა სწორი, სანამ შესაბამისი გარემოებები სათანადოდ არ იქნება შესწავლილი.
საზოგადოებას აქვს უფლება, დასვას კითხვები და მოითხოვოს პასუხები. ამისთვის ნებართვა არავისგან არ არის საჭირო.
საქართველოს უახლეს ისტორიას უკვე აქვს მძიმე გამოცდილება პატიმრების მიმართ არასათანადო მოპყრობისა და წამების ფაქტებთან დაკავშირებით. სწორედ ამიტომ, მსგავს შემთხვევებზე საუბრისას განსაკუთრებული სიფრთხილე, პასუხისმგებლობა და ფაქტებზე დაფუძნებული გამოძიებაა საჭირო.
არც ბრმად უნდა დავიჯეროთ გავრცელებული ინფორმაცია და არც ბრმად უარვყოთ იგი.
საჭიროა ფაქტების დადგენა, მტკიცებულებების შესწავლა და შესაბამისი უწყებებისგან მკაფიო პასუხების მიღება.
როგორც ჟურნალისტი და Newsplus.ge-ს დამფუძნებელი, მიმაჩნია, რომ საზოგადოების მთავარი მოთხოვნა ასეთ საკითხებზე ერთი უნდა იყოს — სიმართლის დადგენა ფაქტებით და არა ვარაუდებით.
კითხვების დასმა არ ნიშნავს ვინმეს დადანაშაულებას. კითხვების დასმა ნიშნავს იმას, რომ საზოგადოებას სიმართლის ცოდნა სურს.
და თუ კითხვების დასმისაც შეგვეშინდება, მაშინ ყველაზე მნიშვნელოვანი — სიმართლის გარკვევის უფლება — შეიძლება დავკარგოთ.
თიკო (თინათინ) შუშანაშვილი
Newsplus.ge-ს დამფუძნებელი და მთავარი რედაქტორი