BBC-ს ინფორმაციით, კრემლმა შეამცირა მოლოდინი რუსეთის პრეზიდენტ ვლადიმერ პუტინსა და უკრაინის პრეზიდენტ ვოლოდიმირ ზელენსკის შესაძლო შეხვედრის შესახებ. ეს განცხადება მას შემდეგ გაკეთდა, რაც აშშ-ის პრეზიდენტმა, დონალდ ტრამპმა, კიდევ ერთხელ მოუწოდა ორივე ლიდერს დიალოგისკენ, რათა უკრაინაში ომის დასრულების გზები განეხილათ.
ტრამპის მოწოდება წინ უძღოდა მის შეხვედრას ვლადიმერ პუტინთან გასულ კვირას ალასკაში. გარდა ამისა, ორშაბათს თეთრ სახლში აშშ-ის ლიდერმა მიიღო შვიდი ევროპელი ლიდერი და ვოლოდიმირ ზელენსკი.
ამერიკის პრეზიდენტმა აღიარა, რომ კონფლიქტის მოგვარება „რთული“ ამოცანაა და დასძინა, შესაძლოა, რუსეთის პრეზიდენტს საერთოდ არ ჰქონდეს სურვილი, შეწყვიტოს საომარი მოქმედებები.
„პრეზიდენტ პუტინის შესახებ უფრო მეტს უახლოეს კვირებში გავიგებთ,“ – აღნიშნა ტრამპმა სამშაბათს. „შესაძლებელია, რომ მას შეთანხმების დადება არ სურდეს.“
მოამზადა:თიკო შუშანაშვილმა