საქართველოსა და უნგრეთის პრეზიდენტებმა ქვეყნებს შორის უსაფრთხო ტურიზმის დერეფნის გახსნის საკითხი განიხილეს

საქართველოს პრეზიდენტი სალომე ზურაბიშვილი დღეს უნგრეთის რესპუბლიკის პრეზიდენტს, იანოს ადერსს ესაუბრა.

საქართველოს პრეზიდენტის პრესსამსახურის ინფორმაციით, პრეზიდენტებმა განიხილეს საქართველოსა და უნგრეთში კორონავირუსთან დაკავშირებით არსებული მდგომარეობა. „უნგრეთის პრეზიდენტმა ძალიან მაღალი შეფასება მისცა კორონავირუსის წინააღმდეგ საქართველოს მიერ გაწეულ ძალისხმევას და მთავრობის მიერ მიღებულ ზომებს. ასევე, მნიშვნელოვნად შეფასდა კორონაკრიზისის პერიოდში ქართველი ხალხის მაღალი თვითშეგნება და პასუხისმგებლობა“, – აღნიშნულია პრეზიდენტის პრესსამსახურის ინფორმაციაში.

მათივე ცნობით, მხარეებმა ისაუბრეს ეკონომიკური კრიზისის წინააღმდეგ მიღებული ზომების მნიშვნელობასა და ტურიზმის გახსნის ხელშეწყობის მნიშვნელობაზე. საქართველოს პრეზიდენტმა აღნიშნა, რომ უნგრეთისა და საქართველოს მთავრობებს შორის მიმდინარეობს მოლაპარაკებები უსაფრთხო ტურიზმის კორიდორის გახსნასთან დაკავშირებით და სალომე ზურაბიშვილმა უნგრელ კოლეგას ამომწურავი ინფორმაცია მიაწოდა იმ კონკრეტული ზომების შესახებ, რომლებიც საქართველოს მთავრობამ ტურიზმის გახსნის სტრატეგიის სახით შეიმუშავა და რომელიც მოიცავს უსაფრთხო ტურიზმს, როგორც უსაფრთხო აეროპორტსა და უსაფრთხო სასტუმროებს.

„პრეზიდენტებმა საქართველოს ევროინტეგრაციის შესახებ ისაუბრეს და როგორც საქართველოს პრეზიდენტმა აღნიშნა, საჭიროა ევროკავშირთან უფრო ღრმა თანამშრომლობა და საქართველოს ევროპული ინტეგრაციის ფარგლებში, მეტი კონკრეტული ნაბიჯების გადადგმა. მათ შორის, უფრო მეტი ინტეგრაცია ევროპული სფეროს სოფლის მეურნეობის სექტორში; საქართველოს პრეზიდენტმა ისაუბრა იმ მოლოდინების შესახებ, რომლებიც საქართველოს პანდემიის შემდგომი პერიოდისათვის გააჩნია, როგორც ქვეყნის როლის მნიშვნელოვანი ზრდის, ასევე სხვადასხვა ინდუსტრიის საქართველოში დაბრუნებასთან დაკავშირებით“, – აღნიშნულია საქართველოს პრეზიდენტის პრესსამსახურის ინფორმაციაში.

მათივე ცნობით, უნგრეთის პრეზიდენტმა საქართველოს პრეზიდენტი სალომე ზურაბიშვილი უნგრეთში ვიზიტით მიიწვია.

მაჩვენე მეტი

სხვა სტატიები

Back to top button