მიხეილ ბატიაშვილი -ჩემი გადაწყვეტილების მიზეზი არის პირადი

ვაფასებ პრემიერ-მინისტრის მხარდაჭერას, როგორც განათლების სისტემის მიმართ, ასევე, ჩემს გადაწყვეტილებასთან დაკავშირებით, – ამის შესახებ მთავრობის  ადმინისტრაციაში ჟურნალისტებს განათლების, მეცნიერების, კულტურისა და სპორტის უკვე ყოფილმა მინისტრმა, მიხეილ ბატიაშვილმა განუცხადა.

მთავრობის სხდომის დასრულების შემდეგ, მიხეილ ბატიაშვილმა განაცხადა, რომ თანამდებობა საკუთარი გადაწყვეტილებით დატოვა.

„მინდა გითხრათ, მივიღე გადაწყვეტილება, დავტოვო მინისტრის თანამდებობა. ჩემი გადაწყვეტილების მიზეზი არის პირადი და დიდ იმედს გამოვთქვამ, ამას არ მოყვება დამატებითი პოლიტიკური სპეკულაციები.

ამასთან დაკავშირებით აქტიური კონსულტაციები მქონდა პრემიერ-მინისტრთან და ძალიან ვაფასებ მის მხარდაჭერას როგორც ზოგადად, განათლების სისტემის მიმართ, ასევე, ჩემს გადაწყვეტილებასთან დაკავშირებით. ასევე, მინდა, დიდი მადლობა ვუთხრა მას, რომ პირადად აქტიურად არის ჩართული რეფორმის ფარგლებში მიმდინარე პროცესებში“ – განაცხადა მიხეილ ბატიაშვილმა.

მიხეილ ბატიაშვილი საქართველოს განათლების, მეცნიერების, კულტურისა და სპორტის მინისტრის თანამდებობას ტოვებს. როგორც საქართველოს პრემიერ-მინისტრმა, გიორგი გახარიამ მთავრობის სხდომაზე განაცხადა, ბატიაშვილი თანამდებობიდან პირადი განცხადების საფუძველზე მიდის.

ამასთან, გიორგი გახარიამ აღნიშნა, რომ განათლების სისტემური რეფორმა უფრო სწრაფ და ეფექტიან განვითარებას მოითხოვს.

ვინ დაინიშნება განათლების, მეცნიერების, კულტურისა და სპორტის ახალ მინისტრად პრემიერს ჯერ არ დაუსახელებია.

მაჩვენე მეტი

სხვა სტატიები

Back to top button